Sen Cuba, nada sería igual

Para quen aspiramos a un mundo diferente, baseado na dignidade humana e non no lucro e acumulación, Cuba é un exemplo que nos permite acreditar en que os nosos soños son posíbeis. A pesar de todas as dificultades, a resistencia da illa rebelde alumea o camiño de quem sabemos que existe vida alén da dictadura do capital e dun mundo dominado polos centros imperiais. As súas conquistas políticas e sociais, moi condicionadas polo cerco imperial e por 60 anos de criminal bloqueo, amosan que existen alternativas alén de renderse ou someterse aos amos do mundo.

Evidentemente o prezo a pagar por esa rebeldía é alto, e os retos e dificultades son innegábeis. Mais non permitiremos que os mesmos que provocan e agravan eses problemas (especialmente no medio dunha pandemia mundial) sexan os que agora pretenden dar leccións de democracia e bo goberno.

Sabemos que a pesar de todas as campañas de intoxicación, Cuba será quen de manter e consolidar os seus logros. A nación que foi quen de enviar médicos a ducias de países para o combate á pandemia e que, con todo en contra, conseguiu desenvolver as súas propias vacinas, demostrará novamente que pode sair adiante, solucionar os seus problemas sen inxerencias e seguir mellorando o seu sistema socialista.

Hoxe máis que nunca, reiteramos o noso compromiso coa Revolución Cubana. Por solidariedade internacionalista, mais tamén porque sen ela nada sería igual e as nosas esperanzas estarían máis lonxe de se facer realidade.